لو مخستيش بقلم سولييه نصار

لو مخسيتيش أنا هفسخ الخطوبة ...اصل انا مش هتجوز تريلا بعدين يا ايوش يا حبيبتي انا معيش فلوس كتيرة عشان اكلك ده انا لولا أني بحبك مكنتش اتقدمتلك .
انا حقيقي مش عارفة ازاي فستان الفرح هيدخل فيها...
ضحك الكل وانا حطيت عيني في الأرض كنت مع مؤمن وعيلته في مطعم لواحد صاحبه ...كانوا بيتريقوا عليا كلهم ...مؤمن خطيبي وولاد خالته ...انا اتخطبت لمؤمن عن حب ...كنت وقتها تخينة بس مش اووي لكن بعد ۏفاة اختي الصغيرة دخلت في حالة اكتئاب وبدأت اكل كتير لحد ما تخنت اوووي وقتها مؤمن بدأ يعلق...صحيح الموضوع بدأ بهزار وانا حاولت اخده بالطريقة دي وعشان ميتضايقش عملت ريجيم وروحت الجيم بس كنت كل مرة افشل ... بس الموضوع بقا اوفر خصوصا أن بحس بالحزن وهما بيتريقوا عليا ...مؤمن قالي دايما أنه بيحب قلبي وأنه ميهموش جسمي لكن دلوقتي باين أن الموضوع هامه وده حقه بس التنمر عليا وأنه يخلي بنت خالته اللي كانت عينيها عليه تتنمر عليا ده آذاني نفسيا...عيوني دمعت وقومت من علي الاكل لقيت مؤمن بيضحك ويقول 

ايه المعجزة دي اتسدت نفسك اخيرا ... استمري علي كده وهتخسي ...
ومن غير ما استني روحت البيت وانا بعيط...كان طول الطريق بيتصل بيا وبيبعت رسايل بس انا رفضت ارد عليه ولا اقري رسايله اصلا ...كنت مقهورة اووي وقلبي واجعني ...دخلت بيتنا وانا بعيط شافتني امي واتخضت وحضنتني وهي بتقول
مالك يا آية فيه ايه بس!!
ماما أنا مش عايزة اكمل في الخطوبة دي 
استغربت وماما وبعدت عني ...كلهم عارفين اني بمۏت في مؤمن وصعب اقول كده بس خلاص فاض بيا مبقتش مستحملة اني كل شوية يتريق عليا ...ما دام مش عاجباه ليه اتقدملي وليه فاضل معايا لحد دلوقتي !!أنا عارفة ان وزني بقا صعب بس يقولي بطريقة الطف ومش كل يوم يحرجني أنا بحاول بس هو مش مقدر ...
ايه اللي حصل بينكم يا بنتي حابة افهم!
مسحت دموعي وقولت
النهاردة برضه اتريق عليا يا ماما وسط قرايبه ...أنا خلاص مبقتش استحمل ...
طيب

اهدي بس وروحي غيري هدومك ولما يجي نتكلم في الموضوع ده ...
هزيت راسي وروحت الحمام ...غسلت وشي وطلعت غيرت هدومي ....كنت جعانة بس رفضت اكل ...ونومت علطول من التعب ...
مر يوم وانا رافضة اي تواصل مع مؤمن لحد ما ابويا طلب أنه يجي ضروري عشان نحط النقط علي الحروف ...ابويا وعدني أن هيحط حد لكلامه ده النهاردة وانا نوعا ما ارتحت...
بالليل كنت واقفة قدام المرايا وانا متوترة ...لبست زي ما بابا طلب مني ...وبعدين طلعت ...بصيت لمؤمن اللي بيبصلي بغيظ بسبب أن بابا كلمه بحدة شوية. 
والله يا بني مينفعش كده أنا مضربتش ايدك عشان تتقدملها انت اللي طلبتها يبقي مينفعش كل شوية تجرحها بسبب حاجة مش بإيديها وهي بتحاول ولا يكلف نفسا إلا وسعها فاهم ...ممنوع من النهاردة تجرحها بكلامك ...
بصله مؤمن ببرود وقال
وانا مش مضطر استحمل الوضع ده انا بقيت اتكسف أخرج معاها ...كذا مرة حطتني في موقف محرج بسبب وزنها ده فعشان كده اما تعمل عملية عشان تتخلص من تخنها ده او افسخ الخطوبة 
انت عايزني اعمل عملية لبنتي ممكن ټموت فيها أو اتفسخ الخطوبة ..
زعق ابويا بعصبية وانا كنت ببص لمؤمن پصدمة ...قد ايه قل في نظري وقتها واتخنقت منه ...مكانش خاېف عليا كان مهتم بمنظره قدام الناس بس ...
بابا ممكن لحظة بس اقولك حاجة ...
قولتها لبابا